შეხვედრა სლოვაკეთის რესპუბლიკის სრულუფლებიან ელჩთან
გარემოს ეროვნული სააგენტოს უფროსი ვასილ გედევანიშვილი სლოვაკეთის რესპუბლიკის საგანგებო და სრულუფლებიან ელჩს საქართველოში მატუშ ბუშოვსკისა და განვითარებისათვის თანამშრომლობის მიმართულების ხელმძღვანელს, კონსულს ზუზანა პალოშოვას შეხვდა.
შეხვედრაზე მხარეებმა საქართველოში გარემოს დაცვის მიმართულებით სლოვაკეთის მთავრობის მხარდაჭერით განხორციელებული და მიმდინარე პროექტები განიხილეს. აღინიშნა, რომ ბოლო ათწლეულში, სლოვაკ პარტნიორებთან ერთად, გარემოს ეროვნულ სააგენტოში არაერთი პროექტი განხორციელდა, რამაც მნიშვნელოვნად შეუწყო ხელი ქვეყანაში წყლის მონიტორინგის შესაძლებლობების გაძლიერებას. საუბარი, ასევე, შეეხო სამომავლო თანამშრომლობის პერსპექტივებს.
აღსანიშნავია, რომ გარემოს ეროვნულ სააგენტოში მიმდინარეობს პროექტი - „თანამედროვე ანალიტიკური მეთოდების დაინსტალირება და დანერგვა ორგანული დამაბინძურებლების განსაზღვრისათვის წყლის ევროპული დირექტივების შესაბამისად“, რომელსაც სლოვაკეთის ტექნოლოგიის უნივერსიტეტი (STUBA) ახორციელებს.
პროექტის ფარგლებში მიმდინარეობს სააგენტოს თანამშრომელთა შესაძლებლობების გაძლიერება წყლის ჩარჩო დირექტივის მოთხოვნების დასანერგად, ასევე, ხორციელდება ტრენინგები ამ მიმართულებით თანამედროვე ანალიტიკური მეთოდების დანერგვისთვის.
